Reji Philip

സാങ്കേതികമായി അനുദിനം ഉന്നതി പ്രാപിച്ചുകൊണ്ടിരിക്കുന്നു അത്യാധുനിക ലോകത്തില്‍ ചില വ്യാഴവട്ടങ്ങള്‍ക്ക് മുന്‍പ് വരെയും അധാര്‍മികവും, പാപവുമെന്ന് വിശ്വസിച്ചു വെറുത്തിരുന്ന പല പ്രവര്‍ത്തികളും, വാക്കുകളും, സ്വാഭാവങ്ങളും ആധുനിക മനുഷ്യന്‍റെ ദൈനംദിന ജീവിതത്തിന്‍റെ ഭാഗമായി മാറികൊണ്ടിരിക്കുന്ന കാഴ്ചകള്‍ ദൈവമക്കള്‍ ഹൃദയവേദനയോടെയാണ് വീക്ഷിച്ചുകൊണ്ടിരിക്കുന്നത്. മനശാസ്ത്ര പഠനമേഖലയില്‍ ഉണ്ടായ വളര്‍ച്ചനിമിത്തം, ഒട്ടുമിക്ക അധാര്‍മിക പ്രവര്‍ത്തികളും ഇതിനോടകം മാനസികരോഗങ്ങളായി നിര്‍വചിക്കപ്പെട്ടു കഴിഞ്ഞു, ഒരുപക്ഷേ നാളെ മനുഷ്യന്‍റെ ദുഷ്ടതകള്‍, ദുര്‍ന്നടപ്പുകള്‍, ലൈംകികചൂഷണങ്ങള്‍, കുലപാതകങ്ങള്‍, അധര്‍മ്മങ്ങള്‍ ഒക്കെ മനശാസ്ത്ര വെളിച്ചത്തില്‍ വിലയിരുത്തിയാല്‍ ഇതെല്ലാം തന്നെ ചില മാനസിക വൈകല്യങ്ങളുടെ അനന്തരഫലമായി ഉണ്ടാകുന്നതെന്ന് നിര്‍വചിക്കപ്പെടുവാന്‍ സകല സാദ്ധ്യതകളും ഉണ്ടെന്നുള്ള കാര്യം നാം മറന്നുപോകരുത്.

ലോകത്തിലുള്ള ഒട്ടുമിക്ക മനുഷ്യരും അവര്‍ ഒരുവിധത്തില്‍ അല്ലെങ്കില്‍ മറ്റൊരു വിധത്തില്‍ ദൈവമക്കള്‍ ആണെന്ന് പ്രത്യക്ഷമായോ പരോക്ഷമായോ അവകാശപ്പെടുന്നുണ്ട്. ചിലര്‍ അതിന് ആധാരമായി വിഘ്നം കൂടാതെ അവര്‍ ആചരിച്ചുകൊണ്ടിരിക്കുന്ന മതാചാരങ്ങള്‍ തെളിവായി ഉയര്‍ത്തികാട്ടുന്നുണ്ട്. മറ്റുചിലര്‍ അവര്‍ ദൈവമക്കള്‍ ആണെന്നതിന് തെളിവായി അവരുടെ ധാര്‍മികജീവിതം, സഹജീവികളോടുള്ള സഹാനുഭൂതി, ആര്‍ദ്രത, ദീനാനുകമ്പ സാമൂഹിക സേവനങ്ങള്‍ ഉയര്‍ത്തികാട്ടുന്നു. മറ്റൊരു കൂട്ടര്‍ ദൈവം കൃപയാല്‍ ദാനം ചെയ്യുന്ന രക്ഷ വിശ്വാസത്തില്‍ സ്വീകരിക്കാതെ, ദൈവം സ്നേഹവാനാണ്, കൃപാലുവാണ് അതിനാല്‍ ഭാവിയില്‍ ഒരു ശിക്ഷ പാപികള്‍ക്ക് ശേഷിക്കുന്നുണ്ടെങ്കില്‍ ഞങ്ങളെ അവന്‍റെ ഈ ദിവ്യസ്വാഭാവങ്ങളുടെ അടിസ്ഥാനത്തില്‍ ശിക്ഷിക്കാതെ ആത്യന്തികമായി രക്ഷിക്കുമെന്ന് ധരിച്ചു ദൈവമക്കള്‍ എന്ന് അവകാശപ്പെട്ട് അവരുടെ പ്രാകൃത ഹൃദയത്തിന്‍റെ അഭിലാഷങ്ങള്‍ക്കും ഇഷ്ട്ടങ്ങള്‍ക്കും അനുസരിച്ച് ഭൂമിയില്‍ പുളച്ചുമതിച്ചു ജീവിക്കുന്നു. സാക്ഷാല്‍ ഇവര്‍ ദൈവമക്കളോ?